Njedawno wotmě so w internaće wosebity wječor. Zeznajomichmy so z kartowej hru “dwójna hłójčka”. Fabian Kola, sobudźěłaćer ZARI, nawjedowaše projekt a rozkładźe nam krok po kroku prawidła, kotrež bě nam w formje infołopjena zestajał a zwobraznił. Při tym wužiwaše jenož serbske fachowe wurazy. Fabian bě jara sćerpny a angažowany. Pokaza nam, kak so dwójna hłójčka hraje. Spočatnje běchu někotři hišće njewěsći, bórze pak mějachmy wšitcy wjele wjesela. Smějachmy so a placachmy karty.

Prěni wječor z dwójnej hłójčku bě połny wuspěch. Bě to spočatk noweho rjada zabawnych aktiwitow z Fabianom w internaće. Wjeselimy so na dalše dźěłarnički, při kotrychž móžemy so w serbšćinje wukmanjeć a so zdobom w lóštnej atmosferje zabawjeć.

Beno Ćemjer, 11. lětnik