W nowym wudaću Lutkow wjedźe awtor Syman Šołta dźěći do lěsa. Tam rozkładźe jim hajnik knjez Dubaw, kak skórniki štomy škoduja, doniž njezahinu a so skónčnje pušća. Zo by so lěs přiwšěm zachował, sadźeja ludźo nowe štomy – hłownje lisćowe štomy kaž lipy, klony, duby a buki. Tež Julka, Alenka a Witko sadźeja štomy a maja při tym wulke wjeselo. Spěwčk “Zwěrjata w lěsu” z pjera Fabiana Kaulfürsta wobrazowu stawiznu wudospołnja.
W dźělu za staršich wěnuje so Alexander Čornak kubłanju za naslědne wuwiće we wšědnym dnju. Dr. Sara Mičkec informuje w 1. dźělu swojeho přinoška “Serbska rěčna praksa w dwurěčnych swójbach” wo wuslědkach z interviewow ze staršimi a dźěćimi serbsko-němskich swójbow.
We wudaću za kubłarki a kubłarjow SPECIAL 2 dawamy nastorki k zaběrje za najmjeńšich z temu „Nalěćo“. Wone wopřijeja mj. dr. přehlad instrumentow, z kotrymiž hodźa so hrónčka – přewažnje k zwěrjatam – hudźbnje zwobraznić, porstowej hrě, stawiznu k wotpinanju a rejowanske nawody k znatym spěwčkam.
