Serbske doma
Zakładne šule mamy hišće dosć w bliskosći bydlenjow, serbskej gymnazijej pak jenož w Choćebuzu a Budyšinje. Tohodla buštej internataj zarjadowanej. Wonej skićitej šulerjam wot 5. hač do 12. lětnika doma, nimale kaž w serbskej swójbje.
Cyle přirodnje serbsce žiwi być
W internaće serbskeho gymnazija móža šulerjo wšědnje serbować – zhromadnje z młodostnymi samsneje staroby a ze serbowacymi kubłarjemi. Tak móža swoje rěčne zamóžnosće wudospołnjeć a tež swoju serbsku identitu dale wuwiwać.
Serbsce so rěči – wšudźe
Nimo zhromadneho zhotowjenja domjacych nadawkow rěči so potajkim tež při warjenju, hraću, sportowanju, paslenju atd. serbsce. Wosebitu hódnotu ma to za dźěći bjez serbskorěčneho swójbneho pozadka, dokelž móža woni wot maćernorěčnje serbskich wobydlerjow wuknyć.
W Rěčnym centrumje WITAJ přistajeny team kubłarjow organizuje přidatnje z wšelakimi partnerami wólnočasne projekty. Bjez internatneho městna njeby mnohim serbskim młodostnym ze zdalenišich wsow móžno było, poskitki zjawnych serbskich institucijow w měsće na wědomje brać, je zeznać a towaršnostne žiwjenje Serbow sobu postajować.
