5. PŁOMJO edicija wušła
W rjedźe Płomjo-edicije je wušła kniha wo 34 zelach a rostlinach, kotruž je Marija Koklina napisała. Kniha zbliži fascinowacy swět domjacych zelow a rostlinow. Kóžda rostlina so na dwójnej stronje předstaja a awtorka je zajimawym wobsaham přidała rjane dožiwjenja, poeziju a kreatiwne ideje. Zawod twori stajnje krótka wosobinska stawizna awtorki. Slěduje nadrobne wopisanje rostliny ze wšěmi wažnymi informacijemi. Nimo toho pokaza kniha mnohostronske móžnosće wužiwanja rostliny. Na kóncu kóždeje dwójneje strony je wotćišćany recept a zdźěla tež pokiw, kak hodźi so rostlina na wšelakore wašnje spřihotować.
Kniha je inspirowacy přewodnik za wšitkich, kotřiž chcedźa domjace zela a rostliny zeznać a sej staru wědu wo domjacych rostlinach wotkryć. Wona hodźi so za šulerjow a šulerki wot 5. lětnika kaž tež za młodostnych a dorosćenych kóždeje staroby.
Knihu dóstanjeće za 9,90 eurow w Smolerjec kniharni, móžeće pak sej ju tež w Ludowym nakładnistwje Domowina skazać.
