Za zajimcow na Rěčnym certifikaće hornjoserbšćiny po Zhromadnym europskim referencnym ramiku za rěče smy naš internetowy poskitk rozšěrili. Wotnětka steja mustrowe nadawki za certifikaciske pruwowanja hornjoserbšćiny runje tak kaž delnjoserbšćiny na niwowje C1 k dispoziciji pod www.sprachzertifikat-sorbisch.de. To rěka, zo móža nětko tež ći, kotřiž maja jara dobre znajomosće serbšćiny, swoje rěčne kmanosće online pruwować. Na zakładźe informacije wo prawosći spjelnjenych nadawkow zhonja, do kotreje měry spjelnjeja žadanja za „mały rěčny diplom“. Mustrowe nadawki wopřijeja wšitke kategorije, kotrež su wobstatk certifikaciskeho pruwowanja C1: zrozumjace čitanje, zrozumjace słuchanje, rěčne elementy, pisanje a rěčenje.
Z nowym poskitkom steji nětko cyłkownje dźewjeć mustrowych pruwowanjow na pjeć rěčnych niwowach za přihoty na certifikaciske pruwowanja k dispoziciji – nimo C1 stajnje po dwěmaj za schodźenki A1, A2, B1 a B2 – a to za hornjoserbšćinu runje tak kaž za delnjoserbšćinu. Nadawki su so w Rěčnym centrumje WITAJ wuwili a w Serbskim instituće z. t. a Instituće za sorabistiku na Lipšćanskej uniwersiće posudźowali. Pruwowanja poskića rěčny centrum w Budyšinje respektiwnje Choćebuzu. Terminy su na mjenowanej internetowej stronje wozjewjene.
