Za serbske dźěćace přebywanišća a Witaj-skupiny je wušła nowa kolenkowa knižka „Leonowa nowa pěstowarnja“. Stawizna bu hižo w najnowšim wudaću Lutkow čisło 4-2020 wozjewjena. Ju je Měrćin Wjenk napisał a Mathias Butendeich ilustrował.
Mały Leon přićehnje ze swojej swójbu z wulkeho města na wjes. W nowej pěstowarni je wšitko hinak a spočatnje so Leonej tam docyła chodźić njecha. Ale poněčim namaka nowych přećelow a jemu so w nowej pěstowarni dźeń a lěpje lubi. Jednoho dnja potom słyši kubłarki wo ptačim kwasu šukotać. Štó drje budźe lětsa braška?
