W Rěčnym centrumje WITAJ mamy swójski wotrjad za lektorat serbskich wučbnicow. Wón wuwiwa wučbne a wuknjenske materialije za šulerjow a wučerjow. Něhdźe 40 titulow wudawamy lětnje, něhdźe 30 z nich zhromadnje z Ludowym nakładnistwom Domowina. Jednotliwym wučbnicam přidawamy husto přewodźace dźěłowe zešiwki a dźěłowe łopjena.

Nimo swójskich wuwićow wudawamy serbske wučbnicy za předmjety kaž na přikład wěcna wěda, nabožina, matematika, biologija, stawizny abo geografija zhromadnje z Ludowym nakładnistwom Domowina. Přełožk licencnych wudaćow renoměrowanych wučbnicowych nakładnistwow přewozmu eksterni awtorojo a fachowi wučerjo. Dale zestajamy słownički a terminologije za jednotliwe předmjety, didaktiske přiručki za serbsku wučbu kaž tež DVDje a CDje. Nimo toho mamy zastupjerjow w Hornjo- resp. Delnjoserbskej rěčnej komisiji.

Něšto wosebiteho: serbske časopisy

Štwórćlětnje wuchadźa časopis Serbska šula. Z wědomostnymi a na praksu wusměrjenymi přinoškami wo serbskej rěči a serbskim kubłanju měri so wón předewšěm na wučerjow a kubłarjow. Serbsku šulu redakcionelnje wobdźěłamy a wudawamy.
Dale wudawamy měsačnje serbskej dźěćacej časopisaj Płomjo a Płomje. Wučerjo wužiwaja jej jara rady jako didaktiski material we wučbje serbšćiny.

Moderne wuknjenje – Hornjoserbsce online

Z DIGITAL – krok po kroku zwažimy so na njeznaty teren. Wuwiwamy prěni serbski digitalny wuknjenski online-poskitk za gramatiku a ortografiju hornjoserbšćiny.