- This event has passed.
Dny serbskeho dźěćaceho dźiwadła 2023
11.05.2023 - 9:00-12.05.2023 - 13:00
Dźěćace dźiwadłowe dny, wuhotowane wot RCW, załožby a NSLDź, wotměja so lětsa hižo k 24. razej a to wot 11. do 12. meje w Budyskej młodowni a w Dźiwadle na hrodźe. Na 50 dźěći ze Serbskeje zakładneje šule Ralbicy, Serbskeje wyšeje šule “Dr. Marja Grólmusec” Radwor, Zakładneje šule “Handrij Zejler” Wojerecy a Žylowskeho Witaj-horta “Njewjerica” je so přizjewiło.
W srjedźišću dnjow steja zaso dźěłarnički, kotrež wěnuja so wažnym ćežišćam dźiwadźelenja kaž improwizaciji a pohibowanju. Dźěłarnički nawjeduja po dobrej tradiciji hrajerjo a režiserojo NSLDź kaž tež dalši fachowcy: Petra-Maria Wencelowa-Bulankec, Beata Nastickec, Katka Pöpelec, Torsten Schlosser a Jurij Šiman.
Štwórtk wječor předstaji Žylowski hort swoju aktualnu hru “Ptaškowa swajźba”. Tohorunja je předwidźane, zo młodźi hrajerjo na kóncu dnjow něšto ze swójskeho dźiwadłoweho repertoira abo z dźěłarničkow prezentuja. Tak chcedźa mjez druhim Wojerowscy šulerjo hru “Mały bojazliwc” pokazać.