15. čitanske wubědźowanje

„Knihi su zastupny lisćik do raja fantazije“ – pod tutym hesłom zarjadujemy lětsa hižo k 15. razej čitanske wubědźowanje za šulerjow 3. lětnika.

Najlěpše čitarki a najlěpši čitarjo wšitkich zakładnych šulow, na kotrychž so serbšćina po koncepće 2plus wuwučuje, – lětsa je jich 12 maćernorěčnych a 10 dźěći, kiž wuknu serbšćinu jako druhu rěč – wubědźuja so sobotu, 13. apryla 2019, w Smolerjec kniharni wo 1. městno. Komu drje budźe so lětsa dobyće radźić?

Najprjedy předstaji kóždy wobdźělnik swoju najlubšu serbsku knihi a předčita wurězk z njeje. Maćernorěčni šulerjo předčitaja w druhim dźělu zarjadowanja přidatnje njeznaty a z tym njezwučowany tekst. Naša wupruwowana a nazhonita jury hódnoći wukony šulerjow a zwěsći najlěpšeho čitarja abo najlěpšu čitarku kóždeje rěčneje skupiny.

Zaměr čitanskeho wubědźowanja je, dźěćom zahe bohatosć a rjanosć serbskeje dźěćaceje literatury zbližić.