Z nowym dźěłowym zešiwkom „Zwučujemy a pisamy 3“ so wučbnicowy rjad za wučbu serbšćiny w třećim lětniku kompletěruje. Dźěłowy zešiwk ma nadawk, šulerjow rěčnje zdźěłować a zdobom kubłać. Zešiwk je tak koncipowany, zo móža dźěći tež samostatnje dźěłać. Nadawki su jasnje formulowane, lochko zrozumliwe a so w swojej formje wospjetuja. Wšitke zwučowanja a zwučowanske formy wotpowěduja žadanjam wučbneho plana a zaručeja nałožowanje jednotliwych wuknjenskich wobłukow.
Zwučowanske strony wobsahuja gramatiske a prawopisne ćežišća jako zjeće temy. Z wobšěrnym poskitkom zwučowanjow je diferencowane dźěło móžne. Tak maja šulerjo mjez druhim prawu leksiku k ilustracijam napisać, teksty dopjelnić, zmysłapołne sady tworić, ze złóžkow słowa tworić, teksty čitać a na prašenja wotmołwić, sej k wobrazam abo wobrazowym slědam stawiznički wumyslić, słowa alfabetisce rjadować a druhe. Lóštne nadawki kaž hódančka, křižowki abo zaběry ze „suchselom“ skulojćeja poskitk na zwučowanjach.
„Zwučujemy a pisamy 3“, skazanske čisło 3/139/25-1A je za 8,90 € w Smolerjec kniharni w Budyšinje na předań. Dóstanjeće zešiwk pak tež přez online-wobchod Ludoweho nakładnistwa Domowina.
