Kompetencny a koordinaciski centrum za pólšćinu we Wostrowcu (KoKoPol) zarjadowaše wot 3. do 5. oktobra 2025 w Marijinym dole seminar za  pólsko-němske swójby wo temje „Wjacerěčne kubłanje dźěći w pohraničnym regionje“. Na nim wobdźělichu so w Němskej bydlace pólske resp. pólsko-němske swójby, kotrež swoje dźěći (tež) pólskorěčnje kubłaja. Zaměr poskitkow za staršich bě, sej wuwědomić róle w swójbje wužiwanych rěčow, swoju identitu (identity) a wizije za swoju swójbu pod rěčno-kulturnym aspektom. Nimo wuměny nazhonjenjow słužeše seminar tež skrućenju komunikaciskich a mediaciskich kompetencow, wosebje hladajo na kulturne rozdźěle w swójbach, přiwuznistwje a wšědnym wobswěće. Naša wědomostna sobudźěłaćerka Jadwiga Kaulfürstowa poda staršim input wo šansach a móžnosćach dwu- a wjacerěčneho kubłanja dźěći, wo rěčnym wuwiću dźěći, wobchadźe z rěčnymi zmylkami a druhich strategijach we wšědnym wobchadźe z dwěmaj rěčomaj. Za dźěći na seminarje wobdźělenych swójbow běchu zaběry zorganizowane, kiž běchu na jich pólsko-němsku dwurěčnosć wusměrjene. Dalši tajki seminar wotměje so 20.–22.2.2026.