W awstriskim Celovcu/Klagenfurće wotmě so 25.–27.9.2025 konferenca „Skupno (zhromadnje) 2025“, na kotruž bě towarstwo za pěstowanje a šěrjenje słowjenšćiny w Korutanskej „Mohorjeva/Hermagoras“ k wosmemu razej přeprosyło. Lětsa wěnowaše so temje „Elementarne kubłanje jako zakład za wuknjenje rěče“, kotraž so z najwšelakorišich perspektiwow wobswětleše. Fachowcy z wědomosće, pedagogiki, zarjadnistwa a  politiki – pochadźacy z Korutanskeje, Słowjenskeje, Ladinskeje a Južneho Tirola – wuměnjachu swoju wědu a swoje nazhonjenja a dawachu impulsy za dalše wuwića. Naša wědomostna sobudźěłaćerka Jadwiga Kaulfürstowa zmóžni wobdźělnikam zarjadowanja pohlad na rěčne prócowanja druheje narodneje mjeńšiny, z tym zo předstaji situaciju Serbow we Łužicy – kak so tu w žłobiku a pěstowarni po modelu Witaj serbskorěčnje dźěła, kajke su zakońske a spěchowanske wuměnjenja a zo tworja so z tym wažne zakłady za serbskorěčne kubłanje w šuli po koncepće 2plus. Přinoški zarjadowanja wozjewja so w konferenčnym zběrniku.