Lětsa spomina Ralbičanska šula na 50-lětne wobstaće noweje šule. Na projektowym dnju poskićichmy srjedu, 24. septembra 2025, dźěłarničce „Serbske powěsćowe figury“ a „Koleso“. Šulerjo smědźachu sej tři dźěłarnički wupytać a sej tak indiwidualny dźeń zestajić.

Naša projektowa sobudźěłaćerka Weronika Butendeichowa předstaji w prěnim přeběhu z pomocu kamishibai (powědarske dźiwadło) připołdnicu. W powěsći powěda holca, kak su ludźo w dawnych časach len předźěłali. Tuž wobhladachu sej šulerjo 2. do 4. lětnika symješka, kotrež w suchej hłójčce lenoweje rostliny tča. Woni zeznachu wšelake lane produkty a naměšachu sej z Łužiskeho laneho wolija słódny twaroh. Nimo toho zahrachu rěčne hry ze słowami, kotrež so w powěsći jewjachu, a zaspěwachu nowy spěw „Lutki maja wulku party“ wot Fabiana Kaulfürsta. W druhim a třećim přeběhu stejachu lutki a zmij w srjedźišću. Stawiznje wo nimaj přednošowaše Saule Ruddigkeitowa, kotraž je wobdźělnica DOMOJ-projekta a swój praktikum pola nas w Rěčnym centrumje WITAJ absolwuje. Na to spaslichu sej šulerjo z pisanych a pismikowych parličkow wěšatko za kluč.

Naš socialny dźěłaćer za swójbne kubłanje Křesćan Lebza je ze šulerjemi 4. do 7. lětnika koleso nic jenož teoretisce, ale tež praktisce rozebrał. Při tym złožowaše so na material „Kołowokoło kolesa“, kiž je so w RCW nadźěłał. Spočatnje wospjetowachu šulerjo wobchadne znamješka a jednotliwe dźěle kolesa. W praktiskim dźělu płatachu potom sami wobruč resp. hadźicu prědnjeho kolesa.