Za šulerjow 7. lětnika na Serbskim gymnaziju w Budyšinje a za dalšich, kiž wučbu biologije na gymnazijach w Sakskej w serbskej rěči maja, je wušła nowa serbska wučbnica biologije „Biosfera 7”. Po wučbnicomaj Biosfera 5 a Biosfera 6 je to třeća w tutym rjedźe jako licencne wudaće nakładnistwa Cornelsen.
Biosfera 7 wobsahuje slědowace kapitle: „Bakterije a wiry”; „Krejny wobtok čłowjeka a imunitna biologija”; „Zežiwjenje, wuměsowanje a pohib”; „Wólbne wobłuki”. Tu wobjednawaja so jědźne mylenja, fitnes a strowota kaž tež mikroorganizmy a jich wuznam. Přizamknje so serbsko – němski a němsko – serbski register z najwažnišimi fachowymi zapřijećemi.
Nazhonitaj serbskaj wučerjej a fachowcaj biologije Rejza Šěnowa a Konrad Lipič staj němsku wučbnicu Biosphäre 7 swědomiće do dobreje a předewšěm do zrozumliweje serbšćiny přełožiłoj. Jimaj na tutym městnje jara wulki dźak za spušćomnu podpěru a radu.
Biosfera 7 wabi spodobneho wuhotowanja wučbnicy dla do wuknjenja. Tež jara aktualnej temje – jědźne mylenja a strowota a fitnes – so tu nazornje wobjednawatej. Tak zhonja šulerjo wjace wo nerwoznej anoreksiji abo maniji suchosće, musklowej maniji, wo wšelakich formach jědźneje manije a wo adipozitas a zaběraja so z přičinami a móžnymi wupućemi hojenja tutych bjezdwěla strašnych mylenjow. Konfliktne situacije w šuli abo doma stej w tutym zwisku tohorunja aktualnej a šulerjo su přeprošeni rozjimać, kak z nimi wšědnje a tež cyle powšitkownje ze stresom wobchadźeja.
