Nowe wudaće LUTKI-zešiwka wěnuje so prawemu zadźerženju w nadróžnym wobchadźe. We wobrazowej stawiznje k wumolowanju a zasopowědanju by Witko bjezmała do awta zaběžał, njeby dźěd jeho w poslednim wokomiku wotzady hrabnył. Tuž zwučujetaj po puću do płuwarnje, kak so droha wěsće přeprěči. Paslenski nawod za amplu a spěwčk “Při ampli” podpěrujetej zaběru z tutej temu.

W přinošku “Wěsće do šule – kak dźěći šulski puć zmištruja” dóstanu starši wažne pokiwy wot fachowče Niny Tzscherntke, projektoweje referentki Němskeje wobchadneje straže z. t. A skónčnje nańdu starši w zešiwku 2. dźěl wuslědkow interviewow dr. Sary Mičkec ze staršimi a dźěćimi serbsko-němskich swójbow k temje “Serbska rěčna praksa w dwurěčnych swójbach”.

W zešiwku za kubłarki a kubłarjow předstajimy serbske rěč spěchowace zaběry za dźěći w horće. Nimo toho wabimy za dalekubłanje k temje “Mimika a gestika w imersiwnym rěčnym kubłanju” z referentom Křesćanom Schröterom, dźiwadłowym pedagogu ze specializaciju na pantomimu a clowneriju kaž tež biografiske a dokumentariske dźiwadło.