Wušła je nowa hornjoserbska terminologija za předmjet biologija. Wona je so w našim lektoraće za pedagogisku literaturu na zakładźe płaćacych wučbnicow znowa zestajała a bu wobšěrnje rozšěrjena a aktualizowana. Do noweje terminologije smy zapřijeli wědu ze slědowacych fachowych wučbnicow, kotrež w serbskej rěči předleža:
- Wučbnicy biologije 5 a 6 za wyše šule w Sakskej,
- Biologija – Level 7 a 8 za gymnazije w Sakskej,
- Biosfera 5, 6 a 7 za gymnazije w Sakskej.
Mjenowana nowa zběrka je za šulerjow wyšich šulow a gymnazijow a njewobsahuje jenož fachowe zapřijeća z registrow horjeka mjenowanych aktualnje płaćiwych wučbnicow, ale kopicu dalšich wažnych a lědma znatych serbskich fachowych zapřijećow. Su to nimo pomjenowanjow za floru a fawnu mjena zwěrjatow a jich stawow ćěła a předewšěm tež wurazy a wobroty hladajo na ćěło a strowotu čłowjeka a jeho rozpłodźowanje a wuwiće. Nadrobnišo čitajće wo tym w 3. čisle Serbskeje šule spočatk awgusta.
Wulki dźak słuša na tutym městnje bywšej fachowej wučerce Rejzy Šěnowej, kotraž je z kritiskim wóčkom a fachowej radu při zestajenju terminologije pomhała a wobšěrne dźěło hač do kónca sobu přewodźała.
Terminologiju za předmjet biologija dóstanu zajimcy a zajimče za kup w Smolerjec kniharni a w online-shopje Ludoweho nakładnistwa Domowina w Budyšinje. Kniha płaći 9,90 eurow.
