Za šulerjow zakładneje šule je wušoł nowy material k spěchowanju čitanskeje kompetency w předmjeće serbšćina, Čitanska sowa. Jedna so wo 9 čitanskich hrow, kotrež hodźa so z cyłej rjadownju hromadźe ‘hrać’. Kóžda hra wobsahuje 24 kartkow k rozdźělnym temam: Šulske wěcy, Jutry/Nalěćo, Drasta, Zwěrjata, Kalender, Swjedźenje/Nałožki, Čas, Budyšin a Napřećiwki.
Čitanska hra je koncipowana jako čitanski rjećaz, pola kotrehož maja dźěći w skupinje sej mjez sobu připosłuchać, předčitać a prawje reagować. Dźěćo ze startowej kartu započina. Kóžda kartka so předčita. Ručež dźěćo w předčitanym swójsku kartu spóznaje, wone wotpowědnje reaguje a předčita potom tekst swojeje karty. Tak dźe to dale, doniž njejsu so wšitke karty přečitali a kónc docpěty.
Nowy material Čitanska sowa, ze skazanskim čisłom 0/210/25-1A, kotryž su koordinatorki zakładnych šulow Kulow, Wojerecy, Slepo, Budyšin a Radwor nadźěłali, je za 16,90 € w Smolerjec kniharni w Budyšinje na předań. Dóstanjeće material pak tež přez online-wobchod Ludoweho nakładnistwa Domowina.
