Wušła je 1. mapa noweho rjadu “Wulět do swěta wědy”, kotraž je so w zhromadnym dźěle z koordinatorkami serbskich zakładnych šulow Chrósćicy, Ralbicy, Worklecy a Pančicy-Kukow nadźěłała. Jedna so wo wuknjenske karty za wěcnu wučbu, kotrež móža so jako wudospołnjacy material w 3. a 4. lětniku wužiwać. Jednotliwe karty wužiwaja so w znatym LOGICO kašćiku nakładnistwa FINKEN (hlej https://www.finken.de/LOGICO/). Wotměnjawe nadawki bazuja na wubranych temach, kaž na přikład kraje a jich chorhoje, stolicy krajow, žito, wóčko, wucho atd., kotrež su wobsah wěcneju knihow “Mlóč 3” a “Mlóč 4” a zdobom wučbnemu planej 3. a 4. lětnika wotpowěduja.
Tutón woblubowany wuknjenski system skića wšitkim dźěćom zwučowanski poskitk, kotryž wjeselo čini a motiwuje. Nadawkowe karty w kombinaciji z kašćikom zmóžnjeja samostatne dźěłanje, wospjetowanje a skrućenje rozdźělnych wuknjenskich wobsahow z bjezposrědnjej samokontrolu.
Mapu dóstanjeće za 18 euro w Smolerjec kniharni abo w online-shopje Ludoweho nakładnistwa Domowina.
