Z nowym lětom ma Serbska šula nowu redaktorku knjeni Bianku Wjeńcynu. Wona je diplomowa sorabistka a dźěła wot lěta 2006 sem jako lektorka w Rěčnym centrumje WITAJ. Do toho skutkowaše 14 lět jako swobodna sobudźěłaćerka pola Serbskeho rozhłosa. Při tutym dźěle wukmanješe so na wosebite wašnje w ertnej serbšćinje. Tuž podpěra jako rěčnica nahrawanja, kaž su wone na přikład za cejdejki a appy Serbsce lochko trěbne. Nimo toho spožči swój kubłany hłós hrajerjam wubranych filmow, kotrež so wot RCW w kooperaciji z SAEK synchronizuja. Jako redaktorka da Serbskej šuli nětko wosebite wusměrjenje z dokumentaciju fachoweho dnja 2plus, kotryž je so loni k prěnjemu razej wuspěšnje w Chrósćicach přewjedł a so kóždolětnje dalewjedźe.

Jedyn z hłowneju referentow bě nawoda Statneho studijneho seminara za wučerstwo na gymnazijach w Koblenzu a profesor za didaktiku fyziki při uniwersiće w Mainzu, prof. Josef Leisen. Wón přednošowaše nazornje wo temje: Rěčnosensibelna wučba – wot serbskeje rěče ke kubłanskej rěči. Jako připóznaty fachowc, publicist a tež wudawaćel metodowych přiručkow wuwědomi rěčnik přitomnym wučerjam na wjacorych přikładach, zo je wažne a trěbne, tež w fachowej wučbje serbsku rěč wužiwać a ju šulerjam na sensibelne wašnje a z dobrym přikładom přikubłać. K tomu předstaji najwšelakoriše didaktiske metody, kiž hodźa so pola rěčnje a fachowje słabšich kaž tež pola wukonolěpšich šulerjow wuspěšnje nałožować. Wo tym kaž tež wo dalšich dopóznaćach k tutej wobšěrnej temje móža so zajimcy tohorunja na internetnej stronje www.fachtag2plus.de wobhonić. Tam su wuslědki dźěłarničkow lońšeho fachoweho dnja jadriwje a přehladnje wopisowane a tež wubrane přinoški Serbskeje šule wozjewjene. Nimo přednoška prof. Leisena dokumentujemy w aktualnym čisle Serbskeje šule tež wuslědki naprašowanjow k wuhódnoćenju fachoweho dnja 2plus. Bosćij Handrik jako zamołwity ze stron kubłanskeje agentury a sobuzarjadowar konferency při tym jasnje zwěsća, zo su prawidłowne centralne dalekubłanske zarjadowanja, kotrež zajimy wšitkich we wobłuku koncepta 2plus skutkowacych wobkedźbuja, tež w přichodźe njeparujomne. Hižo nětko je termin za lětuši fachowy dźeń 2plus jasny. Wón wotměje so 21. oktobra 2017 w Chrósćicach.

Lětuše prěnje čisło Serbskeje šule pak podawa hišće dalše rozprawy wo aktiwitach na kubłanskim polu w serbskej a dwurěčnej Łužicy. Tak móžeće mjez druhim wo lońšich wjerškach a zarjadowanjach Serbskeho šulskeho towarstwa w swojim jubilejnym 25. lěće skutkowanja a wo fachowym dnju SŠT a LIPY w Smjerdźacej čitać. Wučer na wuměnku Jurij Nuk zhladuje na mnohe wuspěšnje organizowane wukrajne rěčne praktikumy Serbskeho wučerskeho wustawa. Dale čitaće wo internetowym blogu fachoweje poradźowarki za rušćinu w Durinskej, rozprawjamy wo studijnej jězbje Serbow do Waliziskeje a wo projektowych dnjach RCW w Choćebuzu. Dr. Beata Brězanowa předstaja didaktiski material wo rozdźělnych wuwićowych faktorach, kiž na wuwiće dźěsća skutkuja a kotrež měli šulerjo Serbskeje fachoweje šule za socialnu pedagogiku při jich kubłanskim dźěle w pěstowarnjach wobkedźbować. Sylwija Šěnowa wopisuje metodu słownych mróčelow, kotraž hodźi so na wyšich šulach a na gymnaziju we wučbje serbšćiny, němčiny abo w dalšich rěčnych předmjetach nałožować. K tomu namakaće dźěłowej łopjeni a konkretne informacije, hdźe w interneće móža wučerjo tajke słowne konstrukty jako přihot na wučbu na poměrnje lochke wašnje zestajeć. Rejza Šěnowa recensuje nowu dźěćacu knihu Křesćana Krawca „Jejdyrko“ a na zadnich stronach 1. čisła Serbskeje šule slěduja pokiwy na wubrane serbske zarjadowanja. Jedne tajke je swójbna schadźowanka dnja 5. měrca 2017 w Chrósćicach. Dalše je čitanske wubědźowanje, kotrež wotměje so sobotu, dnja 1.apryla, w Budyšinje. Wobě zarjadowani RCW hižo wjacore lěta organizuje.

dr. Beata Brězanowa a Bianka Wjeńcyna