Jatšy stoje pśed źurjami a cas jo połnjony z pśigótowanjami na toś ten wjeliki swěźeń. Wósebnje w slěpjańskem regionje woplěwaju k jatšam nałog walkowanja. Se wě, walkuju teke Witko, Julka a Alenka a daju jajkam pó walce dołoj kulaś. Lěc drje budu wjelkowe zuby – wósebny muster na jatšownych jajkach – Witkoju pśi walkowanju pomagaś? Petra Richterojc, kótaraž póchada ze slěpjańskego regiona, jo tšojeńko napisała. W tšojeńce góleśi a starka sami jatšowne jajka wóskuju, ale, se wě, ma teke jatšowny wuchac ruce połnej źěła, ako zgónijośo w spiwje „Luby wuchack, bruny ty“. Naslědku wóstanjo jano hyšći pšašanje, źo z rědnymi pyšnjonymi jajkami. Ceło jadnorje: Połožćo je do gnězdka z kokotkoma, kótarež móžośo sebje z prozneje jajkoweje tejzki basliś! Za nejmjeńšych wózjawijomy palcowe graśe „Wobduwka“.
W starjejšynem źělu pśiwobrośijo se dr. Madlena Norbergowa temje „Rewitalizacija dolnoserbskeje rěcy w familijach“.
We wótkubłaŕskem źělu namakajośo wšake póbitowanja k temje nalěśe, ako na pśikład cyń-sobu-tšojeńko, spiw a rejku.
