Z Lutk 2 – Zwěrjecy alfabet jo Rěcny centrum WITAJ wudał dalšny material k wucbnicy Lutk 2, kenž se góźi teke zwenka togo konteksta wužywaś. Mapa w formaśe A5 wopśimjejo 27 kórtkow z wobrazami a tekstom. Na jadnom boce kórtkow jo pśecej štucka basni Zwěrjecy alfabet wót Erwina Hanuša, pśi comž kužda štucka stoj za jaden pismik dolnoserbskego alfabeta a jadna wó zwěrjeśu, kótaregož mě se zachopijo z danym pismikom (na pśikład A za antilopu, B za byka atd.). Na drugem boce kórtki se namakajo ilustracija z wónym zwěrjeśim. Kórtki z wobrazami a tekstom wabje za dalej wjeźece zwucowanje alfabeta abo jadnotliwych pismikow, wšojadno lěc w šuli, w źiśowni abo doma w familijach.

Material jo zasej zestajiła ceptaŕka serbšćiny Hanka Ješcyna w nadawku Źěłanišća za serbske kubłańske wuwijanje Chóśebuz (ABC) a ilustrěrowała jo zasej Katharina Bußhoff.

Mapa z kórtkami jo na pśedań za 14,90 € w Smolerojc knigłaŕni w Budyšynje, w LODCE w Chóśebuzu a na internetowem boce Ludowego nakładnistwa Domowina pód skazańskim cysłom 2/133/25-1W.