Srjodu, 16.09.2026,  jo na wuknice a wukniki Mozaikoweje šule w Picnju cakało wósebne muzikaliske pśedstajenje w ramiku Serbskego familijowego dnja Rěcnego centruma WITAJ. W sportowej hali jo Serbski ludowy ansambel pśedstajił „Bubon Berta“. Ten koncert z perkusijnymi instrumentami z cełego swěta słuša k nejwěcej woblubowanym kusam SLA. Wěcej ako 150 źiśi jo se za to dopołdnja zejšło. Pśiwitałej stej jich w serbskej a nimskej rěcy ceptaŕka za serbšćinu Stephanie Heinzowa a Katrin Lehmannojc, projektowa wobźěłaŕka chóśebuskego Rěcnego centruma WITAJ.