Dypkownje za nazymski semester w Šuli za dolnoserbsku rěc a kulturu jo Rěcny centrum WITAJ wudał ceło nowu wucbnicu “Wšo jasne! A1” za dorosćone wuknjece dolnoserbskeje rěcy.
Knigły su nastali na zakłaźe górnoserbskeje wucbnice “Wězo serbsce! A1” z lěta 2024 a se orientěruju pó niwowje A1 Zgromadnego europskego referencnego ramika za rěcy (ZER) a pśigótujo njepósrědnje na certifikaciske pśespytowanje na danem niwowje.
Wucbnica ma 5 lekcijow a pósrědnja a zwucujo słowa a wobroty za wšednu komunikaciju w žywjenju dorosćonych, zakładnu gramatiku a korektne wugronjenje. Pśi tom slěduju wuknjece młodemu studentoju Kitoju Krawcoju a jogo familiji a pśijaśelam pśez wšake situacije a temy. Pěta lekcija jo modelowy test na niwowje A1 a ma samsku strukturu ako certifikaciske pśespytowanje za optimalne pśigótowanje za certifikaciju. K tomu wopśimjejo “Wšo jasne! A1” nowu dwójorěcnu kórtu Dolneje Łužyce, wokablowe pśeglědy za kuždu lekciju a cełe knigły a wjele tekstow za słuchanje, kenž mógu se pśez qr-cody wótwołaś.
Knigły su na pśedań za 16,90 € w Smolerojc knigłaŕni w Budyšynje a w LODCE w Chóśebuzu pód skazańskim cysłom 0/213/26-1B resp. ISBN 978-3-7420-2897-6.
