W nowem wudaśu casopisa Lutki se pódaju Witko, Julka a Alenka na wulět do górow. Co su naše tśi pśijaśele pśi swójom drogowanju na góru wšykno dožywili, zgóniju źiśi a starjejše w zapśimujucem tšojeńku Jakuba Barča. Sarah Wićazec jo kreslanki k wumólowanju dodała.
Dalej směju se źiśi na palcowe graśe „Słyńca pśi płośe“ Weroniki Butendeichoweje w dolnoserbskem pśełožku wót Jill-Francisa Ketlicojc wjaseliś.
Starjejše zgóniju w 3. źělu pśinoska „Serbska rěcna praksa w dwójorěcnych familijach“ wuslědki interviewa dr. Sary Mičkec ze starjejšymi a źiśimi serbsko-nimskich familijow. Mimo togo pśedstajijo se towaristwo drježdźańskich Serbow „Stup dale“ a informěrujo wó swójich głownych zaměrach a wupominanjach ako teke wó swójich žycenjach a planach za pśichod.
