Toś tomu gronidłoju pósćiwa se Lutki-wudaśe 2-2022 a póśěgujo se na baseń ze samskim titelom z pjera Jill-Francis Ketlicojc. K basni jo kamjeńska ilustratorka Martina Burghart-Vollhardt wjeliki lěśojski wobraz namólowała. How mógu se źiśi rozglědowaś a pytaś: Wjele źiśi jo na wobrazu wiźeś? Co w zagrodoma wšykno rosćo? A chto tam w stanje sejźi? Wósebnje pśedšulskim źiśam buźo wjasele, zwěrjetam na droze pó gumnje pomagaś. Awtorka Lubina Hajduk-Veljkovićowa rozpšawja wó swójej nowej dwójorěcnej seriji “Dolina pśi rěcy” a za cełu familiju namakajośo srjejź zešywka basleńsku pśedłogu za kóstku za blido z gronkami do jěźi, kótarež jo Fabian Kaulfürst napisał. Wón jo teke tekstaŕ spiwa “Annemarijowa polka za źiśi”, kenž na zachopjeńku zešywka namakajośo.
W starjejšynem źělu cytaśo wó nazgónjenjach serbskeje maśerje Katariny Čornakoweje z wuwiśim dwójorěcnosći jeje synow.
Wótkubłaŕki a wótkubłarje namakaju naraźenja za zaběru z basnju “Radosći w lěśojskem casu”, pokazki za źěło z wimmelwobrazom a słownick.
