W telewiznem magacinje „Łužyca“ rbb pśedstajijo se dnja 17.09.2022 pśełožowański program sotra za rěcnej směra dolnoserbšćina – nimšćina a nimšćina – dolnoserbšćina a dajo se wót togo dnja za wšych wužywarjow pód https://sotra.app dermotnje wótwołaś. Zrazom buźo z tym prědny raz awtomatiski pśełožk mjazy dolnoserbšćinu a górnoserbšćinu k dispoziciji stojaś.
W měrcu 2021 jo se sotra (skrotconka za Sorbian Translator) za pśestajenja mjazy górnoserbšćinu a nimšćinu prezentěrowała a wózjawiła. Pśełožowański program jo nastał pśez zgromadne źěło Rěcnego centruma WITAJ z eksternymi specialistami. Něnto dajo program teke za dolnoserbsku rěc. Źěkowano honorarowym mócam, kótarež su pśi zestajenju korpusa sobu statkowali, a kooperaciji ze Serbskim institutom, kenž jo z dweju słownikowu sady k dispoziciji stajił, jo cas wuwiśa jano połtera lěta wunjasł. Korpusa, wutšoba awtomatiskego pśełožowarja, se stawnje rozšyrjatej. Wónej wopśimujotej tuchylu 90 000 dolnoserbsko-nimskich sadowych pórow a 70 000 dolnoserbsko-górnoserbskich sadowych pórow. Te póchadaju z rozdźělnych žywjeńskich wobłukow a wopśimuju bogaty wokabular a wjelerake gramatiske formy. Z rozšyrjenim bilingualnego korpusa dolnoserbšćina – nimšćina se procujo w pśichoźe mimo togo wó integraciju do Microsoft-translatora a dalšnych pśełožowańskich systemow ako Google-translate. Na boce sotra.app dajo browserowe rozšyrjenje k direktnemu pśełožkoju markěrowanych sadow mjazy górnoserbšćinu a nimšćinu. W pśiducych tyźenjach se rozšyrjenje za rěcny směr dolnoserbšćina – nimšćina k dispoziciji stajijo. Na browseru bazěrujuce pšawopisne pśespytowanje jo južo do programa integrěrowane a zmóžnja teksty pśed pśełožowanim kontrolěrowaś.
Za pókšacowanych wuknjecych rěcow su digitalne pśełožowańske programy pódpěra pśi pisanju tekstow. Za nimskorěcnych nałožowarjow, kenž dolnoserbski njepowědaju, pomaga pśełožowański program pisane teksty w dolnoserbskej rěcy rozměś. Motiwacija dolnoserbsku rěc nałožowaś ma se z pśełožowańskim programom w šulskem konteksće ako teke w pówołańskem a towarišnostnem wšednem dnju spěchowaś.
