Lube starjejše, lube wótkubłaŕki a wótkubłarje,

ako kužde lěto namakajośo w stwórtem cysle Lutkow dlejše tšojeńko k wumólowanjeju a zasejwulicowanjeju. Tenraz jo wóno z pjera znateje serbskeje awtorki Jěwy-Marje Čornakec a ma titel „Kak jo Krabat zmužnemu Jankoju pomagał“: Ako se Krabat, kótaryž jo Carny młyn spušćił a něnto zasej w Jitku bydli, ze swójim psom Awgustom pśechójźujo, słyšy južo z daloka małego Janka žałosćiś. Co jo se stało? Janko jo měł nadawk, gusy pasć. Dokulaž pak jomu se wóstuźujo, lubjej grajka a njezawupytnjo, až pśiźo zakśebjatna liška pó nejrědnjejšu gus. Lěc se gus zasej namakajo a kak Krabat Jankoju pśi tom pomaga, zgónijośo, gaž cytaśo tšojeńko z Wašym góleśim.

Mimo tšojeńka wózjawjamy w Lutkach 4-2021 dolnoserbski spiw „Ptaškowa swajźba“ wót Ingrid Nagloweje. A slědkoju rozpšawjamy wó jubilejnem zarědowanju ku góźbje 20-lětnego wobstaśa Rěcnego centruma WITAJ, kótarež smy w septembrje w Carnem Chołmcu pśewjadli.

Pśidatnje smy za Was, lube wótkubłaŕki a wótkubłarje, wudali zešywk ze źiwadłowym graśim „Kak jo Krabat zmužnemu Jankoju pomagał“, kótarež jo teke Jěwa-Marja Čornakec napisała. Graśe góźi se za 8-15 źiśi w źiśowni, šuli abo horśe.