Kak wobchadam z faktom, až powědam mjeńšynowu rěc w Nimskej/w multilingualnem wobswěśe? Kaku rěcnu strategiju mam we familiji? Kak wobchadam ze zmólkami? Co dejm cyniś, gaž góle njoco serbski powědaś?
My sobuźěłaśerje w Rěcnem centrumje WITAJ wobglědujomy to ako naš nadawk, serbsku rěc zdźaržaś a k tomu pśipomogaś, až se wóna na pśichodnu generaciju dalej dajo. My slědujomy aktualnemu diskursoju k toś tym pšašanjam a pódpěrujomy a wobradujomy serbske starjejše, starki a stare nany a wótkubłaŕki na zakłaźe teoretiskich dopóznaśow.
Teke mjazysobu smy w stawnej wuměnje. Toś smy se koleginu dr. Janu Šołćinu ze Serbskego instituta/Lipšćańskeje uniwersity a dr. Christianu Piniekowu z ABCja pśepšosyli, aby we zgromadnem kole górjejcne a druge pšašanja rozpominali.
Wšykne – kužda mama a kuždy nan, kužda starka a kuždy starki, kuždy kmótš, wujko abo śota, kužda ceptaŕka a kuždy ceptaŕ, kužda wótkubłaŕka a kuždy wótkubłaŕ, ako kubła źiśi dwójorěcnje abo powěda ze źiśimi serbski abo co to w pśichoźe gótowaś a pšawje njewě, kak to zachopiś – su wutšobnje pśepšosone
stwórtk 16. maja, z. 16.00 do klubownje Dolnoserbskego internata.
Zaběra za źiśi jo pśigótowana.
