We wudaśu Lutkow 4-2024 caka na źiśi wósebnosć: Prědny raz su cełobocne ilustracije tšojeńka dopołnje barwojto wugótowane! Tenraz pśebywa Witko kóńc tyźenja pla starki a starkego w Błotach. Starki wulicujo pśecej take rědne tšojeńka ako na pśikład wó plonje, kenž luźam gluku pśinjaso. Witko jo, se wě, narski: Kak wuglěda taki plon? Co wón gótujo? A cogodla leśi plon jano k susedoju? Lěc se pokažo plon teke Witkoju, cytaśo w tšojeńku „Pótajmstwo plona“, kótarež jo napisała Silwija Wjeńcyna a ilustrěrowała Martina Burghart-Vollhardt. Wěcej wó powěsćach a plonach zgónijośo w krotkem wěcnem pśinosku. Se wě, až pśileśijo plon gluki teke k wam domoj! Z pomocu basleńskego rozpokazanja móžośo sebje malsnje takego plona za źiśecu śpu basliś.
Teke 2024 jo Rěcny centrum WITAJ zasej pśewjadł wuměłske wuběźowanje za źiśi ze źiśownjow. Mytowane jadnotliwe a kupkowe źěła małych wuměłcowkow a wuměłcow se w zešywku pśedstajiju.
