Pětk, 24. maja 2024, jo se na dwórje Serbskego muzeja wótměł finale 6. cytańskego wuběźowanja źiśi, kenž wuknu serbsku rěc a pśebywaju pó wucbje we Witaj-hortach. Teke tenraz jo 11 wobźělnikow zastupowało wšykne styri Witaj-horty Dolneje Łužyce: žylojski hort „Njewjerica“, bórkojski hort „LIPA“, brjazyński hort źiśecego pśebywanišća „Styri lětne case“ a wětošojski „Hort móžnosćow“.

Jury, Franc Juro Deuse a Katrin Urbańscyna, jo wuzwóliła dobyśaŕku – 10-lětnu Annu z horta w Žylowje. Pśibytne gósći, rozměj hortnaŕki, starjejše a pśiswójźbne, su kužde góle mytowali z mócnym pśiklaskom. Wšykne wobźělniki su dostali knigły w serbskej rěcy a małe suweniry wót Rěcnego centruma WITAJ. Zarědowanje w zgromadnem źěle Serbskego muzeja a Rěcnego centrum WITAJ jo było pódpěrowane wót Spěchowańskego towaristwa za Serbski muzej Chóśebuz z.t.