Lětosna Šula w zelenem jo se wót 11. do 15. septembra 2023 wótměła. W njej se zaběraju wukniki zwenka wucby z dolnoserbskeju rěcu a kulturu. W dwěma pśeběgoma jo se wobźěliło na tom projekśe w bórkojskej młodowni dogromady 93 źiśi pětego lětnika ze sedym zakładnych šulow. Jim jo było, mimo sobuźěłaśerjow Rěcnego centruma WITAJ, źewjeś ceptaŕkow na pomocy. Mimo cołnowanja jo był woglěd do dešańskego domowniskego muzeja dalšny wjerašk, pśi comž su wobźělniki mjazy drugim zgónili, kak su se jich prědowniki zežywili. Wušej togo su byli muzikowa a rejowańska źěłaŕnicka a grajne dopołdnjo. Wjasołe a z wopismom su źiśi tśeśi źeń Šule w zelenem zasej domoj jěli.
