W rěźe „Narska liška“ jo něnto wujšła druga grajna mapa „Grajne plany 4-6“, kótaraž jo teke myslona ako pśidatny material za wucbu serbšćiny ako cuza rěc. Z teju mapu mógu wukniki zakładneje šule gromaźe wóspjetowaś wokable wšakorakich temow. Za to maju w njej pśirucku a 14 grajne plany, kótarež mógu wužywaś z pomocu kašćika „Wobrazowe kórtki za wuknika“. Tak ako južo pśi prědnej mapje togo rěda, móžotej nanejmjenjej dwě góleśi pěś graśow wuproběrowaś: Bingo, Pyramida, Wuže a jabrje, Slinik a Koło słowow. Jo było trjeba to slědne graśe hynac wugótowaś, aby měli wěcej městna za wobšyrnjejše wobrazki Narskeje liški 4-6. Hyšći raz słušatej grajnej plana “Graśe z barwami” a “Graśe z licbami” k mapje, tencas pak z wěcej barwami a wušymi licbami. Kompaktna pśirucka, w kótarejž su wšykne graśa wopisowane, zapśěgnjo hyšći słownick na slědnych bokach.
Za 14,90€ móžośo skazaś mapu pód skazańskim cysłom 4/108/23-1B wót Ludowego nakładnistwa Domowina. Alternatiwnje móžośo ju teke kupiś w Smolerjec kniharni w Budyšynje (ISBN 978-3-7420-2792-4).
