Nowy projekt Rěcnego centruma WITAJ „ODN – Onlinepśestajaŕ dolnoserbsko-nimski / Onlineübersetzer Deutsch-Niedersorbisch“ jo se 1.4.2021 oficielnje zachopił. Zaměr projekta jo, onlinepśestajaŕ „sotra”* wó dolnoserbsku rěc rozšyriś a spśistupniś. Zwězanje pśestajarjowu ma w pśichoźe zmóžniś, teksty mjazy dolnoserbšćinu a nimšćinu a teke dolnoserbšćinu a górnoserbšćinu pśestajaś. Za pśełožowański program se zběraju a wobźěłuju sadowe póriki, ako su se z nimšćiny a górnoserbšćiny do dolnoserbšćiny pśestajili. Na wobźěłanju sadow su teke eksterne fachowe mócy wobźělone. Mimo togo kooperěrujo Rěcny centrum WITAJ z prof. Frazerom wót LMU Mnichow w nastupnosći optiměrowanja funkcionalnosći pśełožowańskich programow.
Za pśestajenje se wužywatej metoda statistiskego mašinelnego pśestajenja (SMT) a teke nowa metoda neuronalnego mašinelnego pśestajenja (NMT). Pśez projekt móžo dolnoserbšćina wót nowych technologijow a wót slěźenja na pólu mašinelnego pśestajenja profitěrowaś.
