Za wukniki a zajmce dolnoserbskeje rěcy z tu- a wukraja su wujšli nowe knigły „Pó serbsku! – Gramatika za wuknjecych“ wót Jura Šrejdarja a Viktora Zakara. W knigłach se wopisujo na pśistupnu wašnju gramatika dolnoserbskeje rěcy. Lěpšemu rozměśeju pomjenjoneje tematiki tyju wšakorake pśikłady, teke matematiskich wobrotow a operacijow, což jo wužytne wósebnje za wukniki w bilingualnej wucbje. „Pó serbsku!” jo prědna w dolnoserbskej rěcy napisana gramatika. Na kuždem boce stoj pódla serbskego teksta nimske pśestajenje.

„Pó serbsku!” jo wudał Rěcny centrum WITAJ w nadawku Źěłanišća za serbske kubłańske wuwijanje Chóśebuz (ABC). Knigły se pśedawaju w Smolerojc knigłarni w Budyšynje a w LODCE w Chóśebuzu a płaśe 14,90 €. Ku knigłam słuša źěłowy zešywk, kótaryž wujźo w pśiducem lěśe.