Wěcej ako 80 źiśi z pětego lětnika jo se zachadny tyźeń wobźěliło na Šuli w zelenem w Bórkowach. Pśenocowali su w tamnej młodowni, tak ako južo w zachadnych lětach. Wukniki a wuknice su se rozrědowali do dweju pśeběgowu, w kótarymaž su dožywili samski program. Ten njejo jano wobstał z rěcnych zwucowanjow, ale jo teke zapśěgnuł rejowańske a muzikowe źěłaŕnicki, cołnowanje pó Błotach a wulět z „Rumpelgustu“ do muzeja pód gołym njebjom na Lědach.

Na prědnem pśeběgu, wót pónjeźelego do srjody, su se wobźělili šule „Regine Hildebrandt“ z Chóśebuza, Mozaikowa šula z Picnja, Krabatowa šula z Janšojc a šula „Mina Witkojc“ z Bórkow. Šula „Wilhelm Nevoigt“ a UNESCO-projektowa šula, wobej z Chóśebuza, žylojska Lutki-šula a šula „Mato Kosyk“ z Brjazyny su byli w drugem pśeběgu wót srjody do pětka.