Lětosny, južo 19. Witaj-camp jo se wótměł na zwuconem městnje, we wótlažanem Jarješku, pód gólu na kšomje teje małučkeje wjaski. Tenraz jo se tam w prědnem prozninskem tyźenju wupórało 14 źowćow a 18 gólcow. Wětšyna wobźělnikow pśiźo ze Žylowa, wóni chójźe južo na Dolnoserbski gymnazium abo na žylojsku zakładnu šulu. Druge pśidu z Města, ale teke z Janšojc, Picnja a Gołkojc. Lětosne lěgwo jo měł nazgónity team na starosći – Aleksander Draguła z Rěcnego centruma a pomocniki Isabelle Grätzojc, Maja Melcherojc a Maks Bagańc.

Za źiśi a młodostne jo se pśigótował wótměnjaty program. Mimo nadawkow wusměrjonych na nałožowanje rěcy (zeznawańske graśa, pisanje kórtkow a listow domoj a wšake rěcne graśa) wobźělniki su měli móžnosć, swóje kreatiwne zamóžnosći wuproběrowaś. Wóni su na pśikład wumólowali kwětkowe gjarnce, platli a šyli. Za tyźeński nadawk su wóni w kupkach wjerśili filmy, mjazy drugim na motiwach serbskich powěsćowych figurow, a su pokazali fota. To jo jim wjele wjasela gótowało a pśi tom, ako su gronili, su nejwěcej słowow nawuknuli, su ga filmy a fota ze serbskim komentarom pśigótowali. W běgu lěgwa stej se dwa wulěta pśewjadłej – do Krabatowego młyna w Carnem Chołmcu a na Njepilic dwór w Rownem. Wósebnje jo se wobźělnikam ten drugi spódobał. Tam su zgónili, kak se kublo a pśeźěłujo lan, su butru gótowali a za jeje wěrcowanje su sami wšake zela na łuce pytali a su teke wopytali, kaž Njepila z gusynym pjerom pisaś. Naš, ako wuchada z wugódnośeńskich łopjenow, derje raźony Witaj-camp jo se zakóńcył pětk, 1. awgusta z programom za starjejšych. Móžomy južo něnto pśeraźiś, až pśiducy Witaj-camp wótmějo se wót 19. do 24. julija 2026.