Rěcny centrum WITAJ wustajijo wósebne pśipóznaśe młodeje ekscelence w dolnoserbšćinje za wuspěšne nawuknjenje dolnoserbskeje rěcy na wusokem schójźeńku, kenž lažy widobnje nad zakładnym, wšednym niwowom komunikacije. Wósebne pśipóznaśe wujasnijo, až dajo teke zwenka šulskego/uniwersitnego kubłanja wjelebocne móžnosći nawuknjenja rěcy pśez indiwidualne wužywanje zarědowanjow, wucbnych srědkow a wusćełanjow.
Procowaś mógu se wósoby w starstwje wót 18 do 30 lět z wuběrnymi znajobnosćami dolnoserbskeje rěcy. Wóni dopokazuju swóju dojśpjonu wusoku rěcnu kompetencu z wobstaśim certifikatnego pśespytowanja dolnoserbšćiny pó Zgromadnem europskem referencnem ramiku za rěcy nanejmjenjej na niwowje C1 z predikatom „Derje“ abo „Wjelgin derje“.
Pśepódaśe wósebnego pśipóznaśa jo pśedwiźone na pósejźenju Zwězkowego pśedsedaŕstwa Domowiny w nowembrje.
Kazniske pšawo na wósebne pśipóznaśe njewobstoj.
Procowanja wó wósebne pśipóznaśe młodeje ekscelence w dolnoserbšćinje 2025 maju se pisnje zapódaś až do 31. julija 2025 pla: Rěcny centrum WITAJ, dr. Beata Brězanowa, Postowe naměsto 2, 02625 Budyšyn, beata.brezanowa@witaj.domowina.de.
Budyšyn, 24. junija 2025
dr. Beata Brězanowa
wjednica Rěcnego centruma WITAJ
