Pětk, 05.12.2025 jo pśepódał Rěcny centrum WITAJ we wobłuku pósejźenja Zwězkowego pśedsedaŕstwa Domowiny w Chóśebuzu drugi raz wósebne pśipóznaśe młodeje ekscelence w dolnoserbšćinje. Z toś tym pśipóznaśim cesćitej se wósebny angažement pśi nawuknjenju dolnoserbskeje rěcy a wobstaśe certifikatnego pśespytowanja za dolnoserbšćinu pó Zgromadnem europejskem referencnem ramiku za rěcy nanejmjenjej na niwowje C1 z predikatom „Derje“ abo „Wjelgin derje“. Toś to wósebne pśipóznaśe stej se zasłužyłej Mira Dubianojc a Karlinka Wuglaric. Wobej stej chójźiłej do Witaj-źiśownje,  stej měłej bilingualnu wucbu w zakładnej šuli a stej wuchójźiłej Dolnoserbski gymnazium. Wobej stej teke intensiwnje dolnoserbski wuknułej w Zorja-projekśe. Mira Dubianojc studěrujo pódzajtšnu slawistiku w Lipsku a Karlinka Wuglaric jo wót septembra togo lěta koordinatorka w Zorja-projekśe.