15., 25. a 29. nowembra 2025 jo Rěcny centrum WITAJ w Chóśebuzu pśewjadł rěcnodidaktiske dalejkubłanje za wótkubłaŕki a wótkubłarje źiśownjow a hortow k temje „Styri elementy“. Cełkownje jo se 30 wótkubłaŕkow a wótkubłarjow wobźěliło. Zakład dalejkubłanja jo był nowy dwójorěcny material „Wogeń, wóda, pówětš a zemja“. Z pomocu togo wobšyrnego zarědnika jo se nowy tematiski słowoskład naźěłał. Pśez wěcne teksty, eksperimenty a wšake rěcne zwucowanja su se pótom nowe słowa we wšakorakich zwiskach zwucowali. Wušej togo su se dali praksisowe pśikłady za pósrědnjenje tematiki źiśam. Se wě, až jo se zarědowanje teke wužyło za wuměnu nazgónjenjow a zajmne rozgrona.