Pětk, 23.5.2025 jo był prědny balokopaŕski turněr Witaj-wuknikow 5. a 6. lětnika w Dolnej Łužycy. Na njen stej pśepšosyłej Rěcny centrum WITAJ Chóśebuz a towaristwo „Serbske koparje“. Pśišli su mustwa ze styrich šulow: z Dolnoserbskego gymnaziuma Chóśebuz, ze Zakładneje šule „Krabat“ Janšojce, ze Zakładneje šule „Mato Kosyk“ Brjazyna a ze Zakładneje šule „Lutki“ Žylow. Mustwa su wjelgin fairnje a weto z wjelikim wójowaŕskim duchom grali. Brjazyńske mustwo jo sebje dobyśe zasłužyło a jo z pokalom domoj jěło. Kužde mustwo jo dostało wopismo a kuždy grajaŕ jaden sportowy měšk. Facit jo, až jo se prědny turněr wjelgin derje raźił.