Pětk, 16. maja, jo se w Serbskem muzeju w Chóśebuzu wótměł finale 7. Cytańskego wuběźowanja źiśi, kenž wuknu serbsku rěc a pśebywaju pó wucbje we Witaj-hortach. Tenraz jo 6 wobźělnikow (pěś źowćow a jaden gólc) zastupowało Witaj-horty Dolneje Łužyce, rozmjej žylojski hort „Njewjerica“, bórkojski hort „Lipa“ a brjazyński hort „Styri lětne case“.

Wót togo lěta wuběźowanje pśewjedujo se w dwěma kategorijoma: starstwowa kupka 1. a 2. lětnik a starstwowa kupka wót 3. do 6. lětnika.

Jury jo wuzwignuła, až wšykne źiśi su na wjelgin dobrem niwowje teksty cytali a jo wuzwóliła dobyśarjowu. To stej Arthur Mahnhardt (2. lětnik) ze žylojskego horta a Delilah Kušanojc (6. lětnik) z horta w Brjazynje. Wobźělniki su dostali wopisma, knigły w serbskej rěcy a małe suweniry wót Rěcnego centruma WITAJ. Zarědowanje we zgromadnem źěle Serbskego muzeja a Rěcnego centruma WITAJ jo było ako kužde lěto pódpěrowane wót Spěchowańskego towaristwa za Serbski muzej Chóśebuz z.t.