Rěcny centrum WITAJ Chóśebuz jo cesćił dnja 14. maja młodostnych z Dolneje Łužyce, kótarež se wjelgin pilnuju na pólu dolnoserbskeje rěcy.
Styri naraźenja jo RCW dostał: K jadnemu su to 3 młode žeńske z Gołbina, kótarež planuju a organizěruju serbske tradicijowe swěźenje we swójej jsy, ako teke w susednych jsach. Na swěźenjach ako camprowanje, zapust, kjarmuša, ale teke na namšach wóni raźi serbski spiwaju a su teke jatšowne spiwaŕki w Gołbinje. Na namšach a swěźenjach cytaju nagrona w serbskej rěcy a motiwěruju drugich młodostnych, serbski powědaś a, se wě, serbski spiwaś.
K drugemu jo to angažěrowany chóśebuski młodostny ze znaśami serbskeje rěcy. Ako něgajšny WITAJ-wuknik wužywa rad serbsku rěc w medijach: wón ma wjeliku zagóritosć za krotke filmy a druge medijowe projekty. Jogo serbski fantazijowy film „Wrośenje Nadpśirodnego“, kenž jo nawjerśił a w kótaremž jo režiju wjadł, jo prezentěrował na 19. Łužyskej filmowej pśeglědce. Mimo togo jo sobu źěłał pśi wusćełanju „BUBAK“ wót rbb/Bramborske Serbske radijo.