Na 13. decembrje 2024 su se w klubowni Dolnoserbskego internata zmakali serbske familije na lětosnej gódownicce. Do togo, až Janšojski bog jo pśibytnych žognował a jim ze słodkosćami wobraźił, su kjarliž “Ow ty wjasoły, ow ty lubosny” wuspiwali. Ze znatym kjarližom “Na póli su pastyrje” su se zasej bogoju za žognowanje wuźěkowali. Kužda familija jo dostała wót Rěcnego centruma WITAJ wudany spiwnik ze źiśecymi spiwami a kužde góle jo se mógało wubraś jadne knigły, se wě, w serbskej rěcy. Małe źiśi su mógali basliś, te wětše a dorosćone su pyšnili z wóskom gódowne kule. Wobźěliło jo se 9 familijow z 11 źiśimi w starstwje wót pór mjasecow až do 7 lětnika na gymnaziumje. Pśi zaběrach a pówažnych a luštnych rozgronach za blidom cas jo do póznego wjacora jano tak pśeleśeł. Rozžognowali su se z dobrymi žycenjami za adwentski cas a gódy a teke naźeju na pśiduce zmakanja južo w nowem lěśe.