Adwent – myslimy južo pómałem na gódy, luźe wobswětluju swóje domy a dwóry, woglěduju gódowny mark, kupuju dary za swójich lubych.
Rowno w tom casu, w tyźenju pó prědnem adwenśe, pśewjedujo Rěcny centrum WITAJ gromaźe z chóśebuskim Serbskim muzejom gódowny projekt za wuknikow 3. lětnika. Ten južo 26. projekt jo se wótměł na 4 dnjach wót 3. až do 6. decembra. Wobźěliło jo se 13 zakładnych šulow z dogromady 173 wuknikami.
Wjerašk projekta jo był, se wě, woglěd Janšojskego boga, kenž jo wjelgin swětocnje wótběgnuł. Źiśi su byli gnute a su se bogoju za žognowanje a wobraźenje ze zymskimi a gódownymi spiwami wuźěkowali. Pón su w muzikowej staciji zwucowali gódowne spiwy. W tśeśej staciji su se źiśi zaběrali z wustajeńcu Serbskego muzeja.
Gódowny projekt njejo gótował jano źiśam, ale teke ceptaŕkam a zarědowarjam wósebne wjasele.
