We wótlažanem Jarješku na samej granicy Bramborskeje jo se wótměł južo 18. Witaj-camp za źiśi a młodostne, kenž teke w prozninach kśě nałožowaś serbsku rěc. W drugem prozninskem tyźenju wupórało jo se tam 8 źowćow a 18 gólcow. Lětosne lěgwo jo měł mócny team na starosći – Aleksander Draguła a Bernd Melcher z Rěcnego centruma a młode pomocniki Isabelle Grätzojc, Maja Melcherojc a Elias Bisse.
W běgu tyźenja jo nastało pěś krotkich filmow ze serbskimi motiwami abo z dialogami a komentarom na serbski. Njejo lažko groniś, co jo był wjerašk campa – za někotare jo to było wugótowanje šokoladowych toflow w Felicitas, za druge wulět do Budyšyna abo něco drugego. Wumólowanje t-shirtow, graśe wjelikoraz pśi wognišću, nocne wandrowanje, wuměłske wuběźowanje, sportojske graśa, mały kopańcowy turněr a teke pśecej zasej wochłoźenje w poolu pśi kradu lěśojskem wjedrje – z tym a drugim njejo se nikomu wóstuźiło. Cas jo jan tak pśeleśeł a naš, ako se zda, derje raźony Witaj-camp jo se pětk, 2. awgusta, skóńcył z prezentaciju filmow za wobźělnikow a starjejšych.
