Dypkownje za nowe šulske lěto 2024/25 jo wujšeł “Lutk 2 – Źěłowe knigły, 2. źěl” a z tym jo wucbnica za serbšćinu drugego lětnika we Witaj-wucbje kompletna. Ako prědny źěl wopśimjejo dalšne tśi lekcije z wjele tekstami ze swěta z fible znatego lutka Mino a jogo pśijaśelow za skšuśenje cytańskich zamóžnosćow a wjeleserake zwucowanja, w kótarychž wuknice a wukniki treněruju słowoskład, pšawopis a gramatiku. Zwězujucy element jo dalej Krabatowe tšojenje, kótarež źiśi mógu něnto docytaś a w mini-knigłach za baslenje hyšći raz zespominaś. Wucbnica póbitujo zasej za kuždu lekciju portfolijo za pósuźenje swójskego wuknjeńskego póstupa, pomocne boki za wužywanje rěcy a basleńske boki na kóńcu knigłow, ako teke zaspomnjeńske boki we wobalce knigłow. Awtorka cełego Lutk-rěda jo Hanka Ješcyna w nadawku Źěłanišća za serbske kubłańske wuwijanje Chóśebuz (ABC) a naglědniwe ilustracije jo zasej Katharina Bußhoff pśinosowała.
Knigły su na pśedań za 18,90 € w Smolerojc knigłaŕni w Budyšynje, w LODCE w Chóśebuzu a na internetowem boce Ludowego nakładnistwa Domowina.
