K źewjetemu razoju jo Rěcny centrum WITAJ Chóśebuz pśewjadł intensiwne rěcno-didaktiske dokubłanje za wótkubłaŕki a wótkubłarje źiśownjow a hortow ze serbskorěcnymi pórucenjami. Wót 20. septembra do 3. nowembra 2022 su byli styri pśeběgi. Dogromady 32 žeńskich a muskich ze styrich hortow, źaseś źiśownjow a Centruma wušego kubłanja Chóśebuz su se pśez tśi dny intensiwnje dalej kubłali. Na góźinskem planje su stojali muzika, źěło z tekstami, konwersacija, gramatika, rozšyrjenje słowoskłada a temy ze wšednego dnja w dnjownem pśebywanišću. Wobźělniki su wjelgin spokojom z wucbu byli a su dali pokazki k móžnym temam za pśiduce dokubłanja.
