W zwisku z pśeslěźenim pśechada wót źiśownje z Witaj-pórucenim do zakładneje šule z bilingualneju wucbu w Dolnej Łužycy pśedlaže prědne mjazyrezultaty. Wuchadnišćo jo napšašowanje zagronitego pedagogiskego personala relewantnych źiśownjow a zakładnych šulow. Napšašowanje jo mjazy drugim slědujucy problem pokazało: Lěcrownož eksistěruju zwětšego dobre kooperacije powšyknego parta, dajo hyšći rezerwy pśi zgromadnem źěle na serbskem pólu, wósebnje což nastupa kontinuitu pósrědnjenja serbskeje rěcy. Wjele na pśechadnem procesu wobźělonych žycy se wusčejše zgromadne źěło z partnaŕskimi institucijami. Toś ta pótrjeba jo pla pedagogiskego personala pśedšulskego wobłuka wětša ako pla ceptaŕkow. W zajmje kontinuěrujucego rěcnego wuwiśa Witaj-źiśi su nowe kooperaciske formy trjebne.