Lětosa jo se wót 18. do 22. septembra Šula w zelenem wótměła. To jo móžnosć za źiśi pětego lětnika raz se zaběraś z dolnoserbskeju rěcu zwenka wucby. Chóśebuski Rěcny centrum WITAJ jo dwa pśeběga organizěrował. Dogromady jo se wobźěliło 69 źiśi, sedym ceptarkow a jaden ceptaŕ. Wóni su pśijěli z wejsańskich zakładnych šulow Tšupc, Žylow, Janšojce, Brjazyna a Bórkowy a z chóśebuskeju zakładneju šulowu „Unesco-Projekt“ a „Regine Hildebrandt“. Wuknice a wukniki su teke pśijěli z picańskeje a luboraskeje zakładneje šule. Mjazy drugim su se wudali na GPS-drogowanje, wjacornjejše cołnowanje a na drogowanje do Domowniskego muzeja Dešno. Dalšne wjeraški su byli pśednosk wó muzikowych instrumentach, rejowańska źěłarnja a źěłarnja za spiwanje a muzicěrowanje. Program jo se źiśam a pedagogam wjelgin derje spódobał.
