Dnja 17. decembra smy my, sobuźěłaśerje chóśebuskego RCW, wósobny nadawk měli. Smy rozdawali na měsćańskich gódownych wikach gódowny póstrow Rěcnego centruma – jadnu kórtku z napismom „Witaj – Moin Łužyce“. Ta dej nimskorěcne wobydlarje regiona na to pokazaś, až how teke serbska rěc žywa jo. Wuwitanje „Witaj“ k tomu słuša a by mógało jadnogo dnja teke wót cełeje tudejšeje ludnosći wužywane byś. Pó slědnem Łužyskem monitorje jo 49 % napšašowanych za toś to wuwitanje było. Smy se wjaselili tej akciji na gódownych wikach a wětšy źěl luźi jo naš dar źěkownje pśiwzeł.